سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى مادەنيەت جانە سپورت مينيسترلىگىنىڭ باسشىلىعىمەن, سونداي-اق سپورت ۇيىمدارىنىڭ وكىلدەرىمەن جانە ساراپشىلارمەن كەزدەستى. كەزدەسۋدە بۇقارالىق سپورت سالاسىنىڭ جاي-كۇيى, پروبلەمالارى, كەلەشەگى جانە ونى قۇقىقتىق رەتتەۋ ماسەلەلەرى تالقىلاندى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كوميتەت توراعاسى نۇرتورە ءجۇسىپ ءوز سوزىندە مەملەكەت باسشىسى قاسىم-جومارت توقاەۆ VIII سايلانعان پارلامەنتتىڭ ءبىرىنشى سەسسياسىنىڭ اشىلۋىندا سويلەگەن سوزىندە بۇقارالىق سپورتتى دامىتۋدىڭ ماڭىزدىلىعى تۋرالى ايتقانىن اتاپ ءوتتى. ءبىزدىڭ ەلىمىزدە سوڭعى جىلدارى بۇقارالىق سپورتتىڭ الەۋمەتتىك ماڭىزىن ارتتىرۋدا تۇراقتى ءۇردىس بايقالادى. سەناتوردىڭ ايتۋىنشا, بۇل, ەڭ الدىمەن, بۇقارالىق سپورتتى دامىتۋدى قولداۋدا مەملەكەتتىڭ ءرولى ارتىپ كەلە جاتقاندىعىمەن كورىنەدى.
«بۇل كەزدەسۋدىڭ ماقساتى بۇقارالىق سپورت پەن سپورت ينفراقۇرىلىمىنداعى پروبلەمالارمەن تانىسۋ, ولاردى تەزىرەك شەشۋ جولدارىن قاراستىرۋ جانە قۇقىق قولدانۋ پروتسەسىندە ەسەپكە الۋ بولىپ تابىلادى. بۇگىنگى تاقىرىپ اسا ماڭىزدى. وڭىرلەردە وسى سالاعا قاتىستى بىرقاتار پروبلەما بار ەكەنى بەلگىلى», دەپ اتاپ ءوتتى نۇرتورە ءجۇسىپ.
مادەنيەت جانە سپورت مينيسترلىگىنىڭ وكىلدەرى ءوز كەزەگىندە سەناتورلارعا سالانى دامىتۋ ءۇشىن قابىلدانىپ جاتقان شارالار تۋرالى ايتىپ بەردى. ولاردىڭ ايتۋىنشا, دەنە شىنىقتىرۋ جانە سپورت سالاسىنداعى مەملەكەتتىك ساياساتتىڭ ستراتەگيالىق ماقساتتارى مەن مىندەتتەرى, سونداي-اق سالانى دامىتۋدىڭ وزەكتى مىندەتتەرىن ەسكەرە وتىرىپ, ولاردى ىسكە اسىرۋ تەتىكتەرى 2023-2029 جىلدارعا ارنالعان دەنە شىنىقتىرۋ مەن سپورتتى دامىتۋدىڭ تۇجىرىمداماسىندا, سونداي-اق 2020-2025 جىلدارعا ارنالعان بۇقارالىق سپورتتى دامىتۋدىڭ كەشەندى جوسپارىندا كورسەتىلگەن.
كەزدەسۋگە قاتىسۋشىلار سپورتتىق ينفراقۇرىلىمدى دامىتۋ جانە ونىڭ قولجەتىمدىلىگىن ارتتىرۋ جوسپارى تۋرالى ايتىپ بەردى. سپورت نىساندارى جىل سايىن سالىنىپ كەلە جاتسا دا ءالى دە جەتىسپەي وتىر. بۇگىنگى تاڭدا ەلدەگى ينفراقۇرىلىمعا قاجەتتىلىك 50% قۇرايدى.
وتىرىسقا سەنات دەپۋتاتتارى, قر مادەنيەت جانە سپورت, ءبىلىم جانە دەنساۋلىق ساقتاۋ مينيسترلىكتەرىنىڭ وكىلدەرى, ءماسليحات دەپۋتاتتارى, سپورت ۇيىمدارىنىڭ وكىلدەرى قاتىستى.
سەناتورلار كەزدەسۋ سوڭىندا قورىتىندى ازىرلەنەتىنىن جانە ونداعى ۇسىنىمدار ۇكىمەتكە جىبەرىلەتىن اتاپ ءوتتى.